ایشیا کپ: بھارتی میڈیا کا الزام، پاکستانی ٹیم قوانین کی خلاف ورزی میں ملوث

کراچی (ویب ڈیسک)پاک بھارت میچ سے قبل بھارتی میڈیا نے ایک اور متنازع دعویٰ سامنے لا کر نیا شوشہ چھوڑ دیا ہے۔ بھارتی میڈیا رپورٹس کے مطابق انٹرنیشنل کرکٹ کونسل (آئی سی سی) نے پاکستان کے خلاف مبینہ طور پر کارروائی پر غور شروع کر دیا ہے۔

رپورٹ کے مطابق ایشیا کپ میں یو اے ای کے خلاف میچ سے قبل پاکستانی ٹیم نے متعدد ٹورنامنٹ قوانین کی خلاف ورزی کی۔ الزام لگایا گیا ہے کہ قومی کھلاڑیوں نے میچ ریفری اینڈی پائی کرافٹ کو نہ ہٹانے کے فیصلے کے خلاف احتجاجاً میچ میں تاخیر کی۔

مزید یہ بھی کہا گیا ہے کہ آئی سی سی نے پاکستان کرکٹ بورڈ (پی سی بی) کو ایک ای میل ارسال کی ہے، جس میں بدسلوکی اور پلیئرز اینڈ میچ آفیشلز ایریا پروٹوکول کی خلاف ورزیوں کی نشاندہی کی گئی ہے۔

دوسری جانب اب تک پی سی بی یا آئی سی سی کی جانب سے اس معاملے پر کوئی باضابطہ وضاحت یا ردعمل سامنے نہیں آیا۔